Levi Jeans is die derde enkelsnit van Jan Blohm se nuwe album Jenny wat in Julie die lig gesien het. Blohm beskryf Jenny as ’n konsep-album. Dit bestaan uit veertien snitte wat die storie vertel van twee tieners wat in die 1980’s in die klein konserwatiewe spoorwegdorpie, De Aar, woon.
“Levi Jeans was oorspronklik as oorpakke gedra deur werkers. Dit het later ‘n modegier geword. Dit is ook waar die term “Blue Collar” vandaan kom – die Levi Jean baadjie – met die gevold dat mense dan as werkersklas geïdentifiseer was. In ons land se Geskiedenis was daar ‘n tyd en dele van ons samelewing, waar dit verbied was vir ‘n vrou om jeans te dra – die liedjie gaan oor bemagtiging,” vertel Blohm oor die lied wat hy geskryf het.
Levi Jeans gaan oor die bemagtiging van vrouens. Die goedheid van vrouens word beklemtoon met Blohm wat sing “Sy hou nie van blomme pluk nie, sy hou te veel van hoe dit lyk” wat die kern van vrouwees vasvang deur te sê dat vrouens die mooi in die wêreld bewaar en oppas. Die Levi Jeans is ook ‘n metafoor van vrouens wat hard werk en dan sing Blohm van ‘n vrou se mooi is binne haar en dat sy wysheid het. En as eindig hy die koor wat sy haar Levi Jeans soos heilige linne dra, wat sinspeel daarop dat sy nie bang is om te werk nie en trots is daarop.
Verder verduidelik Blohm oor die album “Die album is nie net nog ’n versameling liedjies nie. Ek het baie moeite gedoen om oor die afgelope vyftien jaar liedjies en gedigte saam te sit om ’n storie te vertel. Dis soos ’n fliek van Jenny se lewe.”
LEVI JEANS is beskikbaar op Blohm se album, Jenny.