In die wêreld van Suid-Afrikaanse musiek is daar min bands wat die gees van dans en nostalgie so goed vasvang soos ADAM. Hul nuwe enkelsnit, “Magic in die Meel,” is nie net ‘n lekker deuntjie nie; dit is ‘n viering van die hart van Afrikaanse danskultuur en die tradisie van sokkie – ‘n dansnag vol energie en vreugde. ADAM bestaan uit Hugo Ludik, Christoff de Beer en Nick Jordaan. Ek het onlangs met die band gesels oor die liedjie, hul kreatiewe proses en hul liefde vir tradisies, en hoe hulle altyd nuwe, gedurfde stappe neem.
Op die oog af klink “Magic in die Meel” dalk misterieus. Die band verduidelik hoe die konsep organies ontstaan het. Hulle wou ’n lied skryf oor dans, wat daardie oomblik vasvang wanneer ‘n bekende liedjie skielik anders voel. Soos Hugo Ludik sê die openings lyn van die liedjie beskryf dit die beste: “Ek het al so baie op hierdie liedjie gesokkie, maar hierdie keer voel dit anders.”
Die titel het heelwat nuuskierigheid en gesprekke aangevuur, veral omdat die betekenis “verkeerd” geïnterpreteer het. “Dis nie oor dwelms nie, kinders,” het Hugo laggend gesê. Die liedjie gaan werklik oor sokkie en die pure vreugde van dans – met ’n vars kinkel.
Terwyl hulle onthou het van hul eerste sokkie-ervarings, het die band gewilde sokkieplekke en dansvloere bespreek wat hul musiek geïnspireer het. Hierdie plekke soos Padstal en Wildebeest, met hul neonligte en harde musiek, het ‘n vlaag van nostalgie by die lede opgeroep. “Sokkie-liedjies bring altyd die nostalgie van daardie eerste dansvloer-ervaring,” het hulle gedeel, wat wys hoe belangrik daardie plekke was as inspirasie vir hul musiek. Hugo vertel laggend “Ek is ’n middeljarige man met twee kinders. Ek was lank, lank gelede in ’n plek soos hierdie in my lewe.”
ADAM se kenmerkende klank, verfris vir vandag
Om hul kenmerkende ADAM-klank in 2024 vas te vang, het die band saamgewerk met Robyn Kiley, wat hul eerste drie albums in 2011, 2012, en 2014 gehelp maak het. Hierdie samewerking het die band toegelaat om hul kenmerkende klank te laat herleef met ‘n moderne aanslag. Hugo het verduidelik, “Dis soos die Adam-klank van 10 jaar gelede, maar nou vars en 2024.” Hierdie kombinasie van nostalgiese ondertone en kontemporêre popproduksie gee “Magic in die Meel” die perfekte balans van oud en nuut.
“Dis soos die Adam-klank van 10 jaar gelede, maar nou vars en 2024.”
Die band het gesels oor hul liedjieskryfproses en hoe dit ‘n balans is tussen inspirasie en verfyning. Terwyl melodieë dikwels vinnig ontstaan, is lirieke iets waarna hulle keer op keer terugkeer om die regte boodskap vas te vang. “Ons kyk die lirieke weer en weer om seker te maak dit werk,” het hulle gesê en beklemtoon hoe belangrik lirieke is vir die storie wat hulle wil vertel.
Nick het bygevoeg dat die melodie dikwels is wat die luisteraars eerste vang. “Melodie is wat mense dadelik vang, selfs as hulle nie die lirieke volg nie,” het hy verduidelik. Hierdie benadering toon hul toewyding aan die skepping van musiek wat catchy en blywend is.
ADAM is gewoond aan waagstukke in ‘n genre wat oorspronklikheid vereis. Hulle verstaan dat, om relevant te bly, dit nodig is om af te wyk van die norm. “As jy nie waag nie, kom jy nie by iets unieks uit nie,” het Hugo gesê, wat weerspieël hoe belangrik dit is om in ‘n vinnig veranderende industrie vooruit te bly. Tog, terwyl hul klank groei, bly hul verbintenis tot die sokkiekultuur sterk.
Toe ek hulle vra oor die moontlikheid om “Magic in die Meel” in ‘n ander genre aan te pas, het Hugo grappenderwys voorgestel om ‘n Latyns-Amerikaanse draai te gee, met ‘n samba-invloed. Die liedjie se speelse gevoel kon maklik ‘n nuwe lewe kry oor kulture heen. “Maybe Samba, Columbia street music in South America, where they know all about magic and dancing,” het Hugo gespot, en die lied in ‘n heel nuwe konteks verbeel.
Kyk die musievideo hier:
Met “Magic in die Meel” bring ADAM weer die warmte van Afrikaanse danskultuur na vore. Dit is nie net ‘n lied nie; dit is ‘n uitnodiging na die dansvloer, ‘n nostalgiese knik na aande van vreugde en musiek wat met vriende gedeel word. Of jy nou ‘n ou aanhanger of ‘n nuwe luisteraar is, ADAM se jongste snit beloof om weer die vonk aan te steek – een ritme op ’n slag.
So, as jy “Magic in die Meel” speel, onthou hulle woorde: “Dis nie oor dwelms nie, kinders!” Dit gaan oor die dans, die ritme, en die magie wat daarmee saamkom.