Met meer as 800 liedjies agter sy naam, voel Rudi Claase dat sy jongste vrystelling, getiteld Storm, moontlik die mees betekenisvolle werk is wat hy tot dusver vir homself geskryf het. Hierdie Afrikaanse kontemporêre lied het ‘n diep geestelike wortel, en volgens Rudi het die lied hom gevind eerder as andersom.
“Dit is ‘n lied wat uit Goddelike inspirasie ontstaan het,” sê Rudi. “Daar is ‘n ryk geskiedenis en konteks agter hierdie lied, en hoewel ek eers nou bewus is daarvan, weet ek dat dit nog altyd aan my behoort het. Ek het geen vrees meer vir die storms wat ek in die lewe ervaar het nie – in plaas daarvan het ek een geword.”
Rudi, wat in 2025 sy 25ste jaar in die musiekbedryf vier, erken dat al sy musiek diep geestelik geïnspireer is. Hy beskou dit as ‘n voorreg om te sing wat hy glo God vir hom kies. Hy is ook tans besig om aan die Afrikaans het gees-produksie te werk, ‘n geestelike skouspel wat in 2025 op die planke gebring gaan word. Volgens hom gaan dit iets besonders wees, onvergelykbaar met enigiets wat voorheen gedoen is.
Na ‘n uitdagende gesondheidstryd is Rudi uiteindelik gereed om weer kragtige musiek vry te stel. Storm is beskikbaar op alle groot digitale platforms.
Kyk die musiekvideo hier:
Meer oor Rudi Claase:
Min mense weet dat hierdie bekroonde musikant, voor sy musiekloopbaan, ‘n professionele figuurskaatser was. Hy is op ‘n jong ouderdom ontdek en was op pad om vir die Olimpiese Spele opgelei te word. “Ek moes kies tussen sang en die ys,” vertel Rudi. “Musiek het uiteindelik die ys gebreek.”
Met multi-platinum-albums en talle toekennings agter sy naam, insluitend die gewilde Afrikoon-toekenning van die ATKV wat sy bydrae tot die Afrikaanse taal vereer, het Rudi steeds nederige trots vir sy werk. Hy sê dat die betekenis van die Afrikoon-toekenning diep in sy hart lê en sy skryfwyse tot nuwe hoogtes geneem het.