Die sanger en liedjieskrywer Prop het in die Afrikaanse musiekskatkis gedelf en besluit die legendariese Al Debbo se Hasie Hop is ʼn treffer wat volksbesit is, maar ʼn nuwe baadjie kort.
Hasie Hop is een van vier liedjies is wat uitgereik word op die kortalbum getiteld Proe Soos Nog, met Hasie Hop wat as die eerste enkelsnit beskikbaar gestel word.
Proe Soos Nog bevat vier verskillende snitte, met Agtien Winters wat ʼn diep nostalgiese lied is wat die voete gaan laat jeuk met ʼn traan van vreugde, Boere Boudjies, Like Jou Soos Biltong en laastens Hasie Hop.
Hasie Hop is oorspronklik deur Nico Carstens en Anton de Waal geskryf, maar Prop, wie se regte naam Jan-Adriaan van Rooyen is, het die liedjie verder verwerk en nog lirieke en musiek bygevoeg.
Hasie Hop is steeds ʼn tong-in-die-kies-liefdesverklaring, maar hierdie keer word daar nog meer satire en moderne pop- en rockabilly- klanke bygevoeg om die hedendaagse luisteraar se ore te prikkel.
“Die liedjie gaan oor die liefde en die verskillende manier waarop mans die skoner geslag probeer vlei,” verduidelik Prop, wat getref het met liedjies soos “Gogga”, “Kwaaitjie” en “Bosveld Vakansie”.
“Kwaaitjie” is geïnspireer deur Piet van Rooyen se gedig, Kwaaitjie Melaaitjie en het platinumstatus vir vir sy verkoopsyfers gehaal.
Volgens die musikant het hy Hasie Hop gekies omdat luisteraars wil wegbreek van die ernstiger onderwerpe in die lewe. Hy glo dit is skrywers en musikante se taak om mense vir drie minute op ʼn slag te laat ontsnap van die werklikheid.
Hy verklap dat Hasie Hop een van ongeveer tien nuutskeppings met liedjies wat volksbesit is waarmee hy gespeel het. Die liedjie het so gou onder sy eie vel ingekruip dat hy dit net met sy gehoor moes deel.
Prop hoop Hasie Hop sal ʼn nostalgiese gevoel by luisteraars aanwakker en glo dit is sy roeping om mense met sy musiek te vermaak. Prop het ook self die vervaardiging en regie van die musiekvideo vir Hasie Hop behartig.
Quintin van der Merwe van Quintessential Productions behartig die verfilming van die musiekvideo vir Hasie Hop, terwyl Prop self die vervaardiging hanteer.
Die musiekvideo is by die Bossa-restaurant in Silver Lakes geskiet. Big Ben Parody, wat voorheen aandag in Prop se video’s getrek het, asook Fatman verskyn in die musiekvideo.
Oom Paul Jordaan, ʼn legende in die musiekbedryf, is ook in die video te sien.
Kyk die musiekvideo hier:
Prop het in 2023 voor ʼn gehoor van 35 000 mense gestaan tydens die groot Krone-konsert by Loftus. Die ikoniese Laurika Rauch het ook een van sy snitte opgeneem.
Meer oor die kunstenaar:
Jan-Adriaan van Rooyen, bekend as Prop, is nou 23 jaar in die musiekbedryf doenig.
Prop het as kind talle operasie verduur weens die skeletale displasie waarmee hy gebore is. Hy was gevolglik met tye vir maande aaneen aan ʼn rolstoel vasgekluister met sy bene in gips.
Prop se bokaak is onderontwikkel weens oortollige medikasie as sewe maande oue baba. Hy het ook wonderbaarlik ʼn stryd van 3 maande teen septisemie in die hoësorgeenheid oorleef – die eerste mens onder 14 jaar in daardie stadium van die mediese geskiedenis. Hy het sy tyd verwyl deur vir ure lank na musiekvideo’s te kyk en dit het ʼn liefde vir musiek by hom aangewakker.
Hy het aan die einde van sy gr. 8-jaar, in 2001, ʼn kitaar ontdek en ʼn skeppende wêreld van kitaarspeel en sang vir hom oopgemaak. Hy het later ʼn toerende musikant geword en vir ʼn dekade saam met die Afrikaanse sanger en akteur Robbie Wessels gespeel. Prop het uit die staanspoor meer melodieë geskryf as lirieke en het daarvan gehou om eerder ander musikante se liedjies te sing.
Hy sê hy sal graag met kunstenaars soos Ricus Nel, Riaan Benadé en Neil Sandilands wil saamwerk. Mense en hulle stories inspireer Prop se musiek en hy skryf oor enigiets wat betekenis meebring. Die musiekbedryf het hom geleer dat ʼn doen dit self houding en harde werk jou ver kan bring.
Die kunstenaar is ook elke jaar betrokke by die Solidariteit Helpende Hand se Lig Konsert, waarvan hy ʼn stigterslid van die reeks konserte is wat geld in samel vir studente wat leef met gestremdhede. Wanneer Prop nie musiek maak nie, werk hy as geregistreerde argitek in die korporatiewe, administratiewe afdeling. Prop is ook ʼn pa vir sy seun en toegewyde man vir sy vrou.