Marius Willemse se splinternuwe enkelsnit, Op die Plaas, sal luisteraars se voete laat jeuk en hulle vingers op die stuurwiel laat tik wanneer hulle in die verkeer daarna luister.
Dié Afrikaanse Country-snit is geskryf deur die talentvolle Neil Somers en vervaardig deur Jade Storm. Die lirieke beskryf die storie van die sanger se lewe toe hy as ’n jongeling die vryheid van die platteland ervaar het. Ongelukkig het verantwoordelikhede gedruk en moes hy gaan studeer om ’n kwalifikasie agter sy naam te kry en toe verwerf hy sy honneursgraad in BSc konstruksiebestuur aan die Universiteit van Pretoria.
“Ek het in die sekulêre wêreld beland nadat ek gaan studeer het, waar ek noodgedwonge ’n loopbaan moes aandurf in die korporatiewe bedryf” sê die sanger oor die inspirasie agter die lirieke. “Die lewe het sy draaie geloop, maar tóg het ek die geleentheid gekry om op die plaas, waar ons nou is, op te eindig. Neil het my hele reis baie mooi verwoord in die lied.”
Op die Plaas is die talentvolle sanger se eerste amptelike enkelsnit, aangesien hy nou eers die afgelope twee jaar lank al in die musiekbedryf is. Sy eerste opname is vir ’n spesifieke teikengroep van omtrent 200 mense geskryf en is slegs op YouTube vrygestel en nie op ander mediaplatforms ook nie.
Oor wat die lied vir die sanger op ’n persoonlike vlak beteken verklap hy die volgende: “Omdat die liedjie ’n direkte vertolking van my lewe is, is dit vanselfsprekend dat dit baie diep in my hart lê. Ek weet dat dit ook met baie ander daar buite sal praat – beide die mense wat ook soos ek op die plaas geland het, en ook diegene wat graag op ’n plaas wil woon.”
Marius is hoopvol dat die enkelsnit goed ontvang sal word deur die publiek omdat hy glo dat elke luisteraar sal kan vereenselwig met die lirieke, want die kern van die boodskap is dat mense nie bang moet wees om hulle drome na te jaag nie.
Kyk die musiekvideo hier:
Boerdery is in die sanger se bloed – sy pa was immers ’n suksesvolle skaapboer met ’n stoetery op ’n landbouhoewe buite Pretoria, waar hy groot geword het. Een Kersfees het sy pa vir hom en sy broer elkeen ’n lam as geskenk gegee, waarmee hulle kon doen wat hulle wou. Op sewejarige ouderdom het hy met die ooi gaan skou en toe die junior nasionale kampioenskappe gewen.
Tans bly hy saam met sy vrou en twee pragtige dogtertjies op ’n plaas tussen Villiers en Standerton, op die grens tussen die Vrystaat en Mpumalanga.
Lekoa Lodge wat hulle hoof besigheid is fokus grootliks op konferensies en troues en is op die oomblik die paar se hoof besigheid.
Op die ouderdom van 34 het Marius sy eerste akoestiese kitaar gekoop. Omdat hy nie uit ’n musikale familie kom nie, het hy nie veel gedink aan ’n loopbaan in musiek nie. In Mei 2022 het Steve Hofmeyr by die lodge oorgeslaap en het die twee aan die gesels geraak. “Die gesprek het na die onderwerp van musiek verander en om ’n lang storie kort te maak, het hy my uitgedaag om te begin sing. Daai Augustus het ek een aand met sy liedjie, Agter Elke Man, vir die eerste keer voor ’n gehoor opgetree saam met Armand Steenkamp, en ja, die gogga het net daar gebyt.”
Vir dié diep siel moet ’n goeie liedjie iets meer beteken. “Daar moet tog betekenis wees en nie net ’n drom vol woorde wees wat lekker ritme het nie,” sê hy. “Ek dink dit is hoekom ek ook so van country-musiek hou, bloot omdat dit meestal ’n storielyn het.”
Sy plaaslike rolmodelle is onder andere Richard van der Westhuizen, Zak van Niekerk Laurika Rauch, Ricus Nel en Steve Hofmeyr. Internasionaal kyk hy op na kunstenaars soos Neil Diamond, Chris Stapleton, Chris Norman en Dolly Parton.
As jy hom vra saam met wie hy graag sou wou werk, is name soos Ricus Nel, Hugo, Armand Steenkamp en Richard van der Westhuizen op sy lys. Die groot droom vir hom is natuurlik om eendag die verhoog te deel met Steve Hofmeyr.
Die musiekbedryf het reeds al vir die sanger ’n paar lesse in nederigheid geleer, soos dat vermaaklikheidsterre nie op troontjies gesit moet word wat ontoeganklik is vir die publiek nie. Hulle is ook maar net familiemanne of -vroue wat hulle talente uitleef.