Na die vrystelling van haar eerste enkelsnit, Quicksand, in November verlede jaar, stel die sewentienjarige Lisa Taylr nou uiteindelik haar debuutalbum, getiteld The Eleventh Hour vry.
Hierdie debuut gaan gepaard met die vrystelling van nog ‘n enkelsnit vanaf die album, Summer Nights.
“The Eleventh Hour” is ‘n elfsnit-album, wat liedjies bevat wat almal deur Lisa self geskryf is. Die album bevind hom hoofsaaklik in die pop-genre, maar bevat ook liedjies met elemente van rock en indie daarby. Die titel van die album, wat gedefinieer word as die “laaste moontlike oomblik”, het ook nogal die simboliese betekenis, aangesien die hele album in slegs ses weke opgeneem en vervaardig is. Lisa het die musiek wat op die album gevind is, begin skryf ná ’n diagnose wat haar moontlik kon verhinder het om die album te kon voltooi: skildklierkanker.
Een van die risiko’s verbonde aan die prosedure wat Lisa moes ondergaan om die kanker te verwyder, ‘n tiroïedektomie, is moontlike stembandskade. Die gedagte dat Lisa die risiko loop om haar stem te verloor voordat sy selfs ‘n geleentheid gegun is om haarself deur haar musiek uit te druk, was een van die vele bykomende inspirasies agter die album, sowel as die haastige produksieproses.
“Die gedagte om my vermoë om te sing te verloor, was seker die grootste uitdaging wat ek ooit moes trotseer. My ouers was so ondersteunend en hulle het vir my gesê ek kan ‘n album voor my operasie opneem, nie net om my gedagtes van die naderende tiroïedektomie af te neem nie, maar ook om van die liedjies vas te vang sou iets verkeerd loop.”
Gelukkig was die operasie ‘n massiewe sukses, wat nou weer beteken dat Lisa ‘n tweede kans gegun is om haar passie vir musiek na te streef. Luisteraars kan dus uitsien na nog vele toekomstige vrystellings van hierdie talentvolle musikant, liedjieskrywer en sanger.
Die enkelsnit van die album wat die vrystelling vergesel, Summer Nights, put inspirasie uit Lisa se geweldige liefde vir die see. Sy druk uit dat die ritmiese klank van die branders en die sand onder haar voete haar kalmte verleen. Die liedjie kan gesien word as in die pop-genre, met ondertone van rock-elemente, en akkommodeer dus enige en elke luisteraar se voorkeure.
Die liriese inhoud van die liedjie kan gesien word as ‘n herinnering om die klein dingetjies in die lewe te waardeer, en Lisa hoop dat haar luisteraars hiermee sal kan vereenselwig.
Luister na Summer Nights hier:
Alhoewel Lisa nog jonk is, staan haar musiekloopbaan tans agter haar naam vir niemand terug nie. Een van Lisa se belangrikste oomblikke in haar loopbaan was om die hoofsanger van Jacaranda FM se 942’s-groep te wees, gestig deur niemand anders nie as Martin Bester.
In 2018 het sy ook agt goue, twee silwer- en een bronsmedaljes verower as gevolg van haar deelname aan SACOPA (Die Suid-Afrikaanse Kampioenskap van Uitvoerende Kunste). Na hierdie sukses het sy deurgedring tot die wenspan, wat haar toegelaat het om na Los Angeles te reis vir die wêreldkampioenskappe, wat haar gelei het om nog ‘n goue, silwer en brons medalje te wen.
Geen vreemdeling vir Broadway-musiekblyspele nie, was Lisa ook deel van ‘n produksie by Montecasino in 2019, genaamd “Born To Perform”.
Lisa put inspirasie by die internasionale ster, Taylor Swift. Sy bewonder die sangeres se vermoë om haarself te herdefinieer met elke nuwe album wat sy vrystel – ‘n element wat Lisa ook graag by haar huidige en toekomstige vrystellings wil hê. Op die vraag met wie sy graag plaaslik wil saamwerk, is haar antwoord ook niemand anders as Karen Zoid nie.
Een ding wat luisteraars verbaas sal wees om van Lisa te weet, is die feit dat sy die eienaar is van ‘n bebaarde draak, genaamd Jinx! Wanneer Lisa haar musiek skryf, word Jinx altyd op haar skouer gevind, waar sy haar wakende oog hou oor wat gekomponeer word, en uiteindelik ook haar kopknik van goedkeuring gee oor die ryk-in-stof musiek wat geskryf word.
“Musiek was nog altyd my passie. Dit is my beste vriend. ’N dag sonder musiek is vir my geen dag nie.”
Vir Lisa is hierdie album ‘n viering van die lewe. Ná haar suksesvolle operasie word sy deur die album daaraan herinner dat haar passie vir musiek lang lewe sal hê;
Dat haar eerste album tog nie haar laaste sal wees nie.
Summer Nights kan gevind word op The Eleventh Hour, wat nou op alle digitale stroomplatforms beskikbaar is.