Nadat sy dit reggekry het om plaaslike musiekliefhebbers te bekoor met haar eerste enkelsnit in 2022, is die sanger en liedjieskrywer, Jaid River, terug in die kollig met die vrystelling van haar langverwagte tweede enkelsnit en debuut-album.
Stad van Verlange is ’n kragtige ballade oor die ervaring om agter te laat wat jy ken en die onsekerheid en twyfel wat daarmee gepaard gaan wanneer jy vir die eerste keer alleen in ’n nuwe stad of plek is.
Dit is ’n emosionele verkenning van die herinneringe, mense, drome en woorde waaraan jy wil vasklou en wil veilig hou, al is dit nie meer wat dit was nie, en die liedjie getuig van die mens se kwesbaarheid asook die musikant se skryftalent.
“Elke lied wat ek skryf en vrystel dra ’n stukkie van my storie en wie ek is. Om dit te kan deel met mense is vir my verskriklik spesiaal,” verduidelik sy. “Ek dink die tema van die liedjie is iets waardeur ons almal op ’n stadium in ons ons lewe gaan, die eensame deel van groot word, en ek dink ook ons almal wil eintlik net weet dat ons nie alleen is in wat ons voel nie.”
Stad van Verlange volg in die voetspore van Duisend Jaar Van Nou, wat baie goed ontvang is en vir haar drie benoemings verseker het by vanjaar se Afri-Indie Onafhanklike Kunstenaartoekennings.
River se debuut-album is die hoogtepunt van haar harde werk en toewyding aan haar musiek en is nou op digitale platforms beskikbaar.
Laai dit hier af: https://linktr.ee/jaidriver
Verlanger kombineer ’n diverse reeks genres, insluitend pop en volwasse kontemporêre musiek. Die tema van die album is verlange, met elke liedjie wat ’n ander tipe verlange ondersoek, of dit nou na mense, plekke, duidelikheid of ’n droom is.
“Ons almal verlang na iets en die album herinner jou om in die oomblik te leef en die mense en plekke rondom jou raak te sien en te koester,” deel sy.
Jaid het al die liedjies op die album geskryf behalwe Gee Nie Om Nie, wat sy saam met Jaco Smit geskep het. As jy haar uitvra oor haar gunstelingsnitte sonder sy Verlanger uit vir sy kragtige lirieke en persoonlike betekenis en Stilte, wat sy geskryf het oor die vrede wat sy by die Karoo Stilfees in 2016 ervaar het.
Die album is oor ’n tydperk van2 jaar opgeneem en vervaardig deur Jaco Smit en Gideon Botes. “Om hierdie album te maak was een van die lekkerste dinge wat ek nog in my lewe gedoen het en om dit saam met vriende te kon doen, het dit nog beter gemaak.”
Jaid, wie se regte naam Jeanlie Minnie is, is in Potchefstroom gebore en het in George grootgeword.
Die jong sanger en liedjieskrywer het in 2016 (op die ouderdom van sewentien) by restaurante en markte begin optree. In dieselfde jaar, het sy die geleentheid gekry om by die Karoo Stilfees op te tree saam met kunstenaars soos Joshua Na Die Reën, Lizandra Winter, Len Muller, en Jaco Van Der Merwe, en blywende vriendskappe is gevorm.
Voordat sy haar diploma in musiek verwerf het aan die Tshwane Universiteit van Tegnologie in 2018, het sy meer oor die musiekbedryf geleer onder leiding van Lizandra Winter en Joshua Na Die Reën.
Nadat sy haar diploma in 2021 verwerf het, het sy in alle erns op haar musiekloopbaan begin fokus.
Tans is sy besig om die reëlings vir haar albumvrystelling te finaliseer en sien sy uit daarna om die land vol te toer met haar musiek en om saam met ander musikante en liedjieskrywers te werk.
Verlanger is reeds digitaal beskikbaar vanaf 17 Februarie 2023 en word bekendgestel met ’n lewendige vertoning op 3 Maart 2023 by die AfriForum-teater in Pretoria. Joshua na die Reën sal as gaskunstenaar optree tydens die geleentheid, terwyl Jaid vergesel sal word deur ’n lewendige orkes, wat bestaan uit Jason Moser op dromme, Manalisi Mdaka op baskitaar, Jaco Smit op elektriese en akoestiese kitaar, klavier en agtergrondstem, Andreas Van Tonder op akoestiese en elektriese kitaar, en Alzanley Lizemore as agtergrondsanger.
Die vertoning begin om 19:00 en kaartjies is beskikbaar by https://afriforumteater.co.za/product/jaid-river-se-albumvrystelling-verlanger/
Met haar kragtige stem en sielvolle lirieke, gaan Jaid River beslis ’n beduidende impak op die plaaslike musiekbedryf hê. Moenie die kans mis om haar in lewende lywe te sien op tree en deel te wees van die begin van wat beloof om ’n lang en roemryke loopbaan te wees nie.
Verlanger is beskikbaar op alle digitale platforms.