Vir die opkomende kunstenaar Jaakie was die samewerking met die ikoniese Afrikaanse rapper Jack Parow ‘n droom wat waar geword het. “Die hele proses was ‘n vergrootglas-ervaring,” vertel Jaakie. “Dit het my kuns en inspirasie na ‘n hoër vlak geneem. Ek kan steeds nie glo dat ek ‘n liedjie gemaak het met die grootste Afrikaanse rapper ooit nie.”
Die enkelsnit, “Hulle”, het reeds groot opslae gemaak met meer as 35 000 views op YouTube en 10 000 streams op Spotify, en dit is net die begin van wat soos ‘n ongelooflike musiekreis vir Jaakie lyk.
Alhoewel Jaakie oor jare heen ‘n passie vir musiek ontwikkel het, het sy lewe ‘n drastiese wending geneem op 11 April 2024. Sy vriend, Francois van Straten, het hom genooi om foto’s en video’s te neem by Sunset Studios. Hierdie toevallige uitnodiging het die deurbraak geword waarna hy nooit geweet het hy soek nie.
Tydens sy besoek het Jaakie begin rondspeel met lirieke en idees. Die musiekvervaardiger Fred den Hartog het dadelik die potensiaal raakgesien en voorgestel dat Jaakie ‘n kans waag agter die mikrofoon. Hierdie spontane oomblik het die geboorte van Jaakie, die kunstenaar, gemerk.
“Ek kon dit voel—die energie, die vreugde, die klik van al die stukkies wat in plek val,” sê hy.
Die enkelsnit “Hulle” het ontstaan uit die visie van Fred den Hartog, wat Jaakie aangemoedig het om Afrikaanse musiek te skryf. Jack Parow, ‘n legende in die Afrikaanse musiekbedryf, het dadelik ingekoop in die projek.
“Jaakie het ‘n amazing vibe,” sê Parow. “Sy energie en hoe hy dinge aanpak, is net so cool. Ek hou van mense wat nie op hulle laat wag nie, wat self inspring en dinge aan die rol kry. Ek dink ons gaan nog lekker saamjol en moeilikheid maak in die toekoms.”
Die lirieke van “Hulle” is geïnspireer deur die bekende slagspreuk van MMA-veghouer Dricus de Plessis, “Hulle weet nie wat ons weet nie.” Die liedjie is ‘n viering van Suid-Afrikaners se unieke uitkyk op die lewe.
“Ek wou ‘n gevoel van samehorigheid vasvang,” sê Jaakie. “Ons is Suid-Afrikaners, ten spyte van ons verskille. Hierdie liedjie is vir almal.”
Die musiekvideo, vervaardig deur die kreatiewe agentskap Perissos, waaraan Jaakie saam met David van Heerden, Karlo Viljoen, Daniel Jooste, en Josh Brand werk, dra by tot die kragtige boodskap van die liedjie.
Jaakie se volgende enkelsnit, “Kolwyntjie,” in samewerking met VAN STRATEN, word op 6 Desember 2024 vrygestel. Hy beskryf dit as “’n Soete Ontsnapping in Liedvorm”—‘n romantiese liedjie vol warmte en genot.
Met sy kreatiewe energie, samewerking met groot name soos Jack Parow, en sy unieke perspektief op Suid-Afrikaanse musiek, is Jaakie besig om sy naam in die bedryf te vestig. Hou hierdie opkomende kunstenaar dop—sy reis is net aan die begin.