Die bekroonde Suid-Afrikaanse sangeres, Andriëtte, is terug met ‘n klankbaan wat die Afrikaanse taal en kultuur op ‘n unieke manier vier. Haar splinternuwe enkelsnit, Afrikaans Het Nie Brieke Nie, is Vrydag vrygestel op alle digitale platforms, en dit is reeds besig om voete te laat jeuk en harte te vul met trots.
Die liedjie is ‘n viering van Afrikaans, gemik op almal wat trots is op hulle taal en kultuur. Andriëtte se liefde vir Afrikaans was die inspirasie agter hierdie energieke lied, wat daarop gemik is om mense te laat dans, te laat glimlag, en die vreugde van Afrikaans wees te vier. “Ek is Afrikaans, en ek het ‘n passie vir my taal. Ek wil daardie trots en energie met ander deel,” vertel Andriëtte. Die liedjie is nie net ‘n bietjie van ‘n oorwurm nie, maar ook ‘n herinnering aan hoe ryk en lewendig die Afrikaanse kultuur werklik is.
Met die talentvolle liedjieskrywer en produsent Emil Struwig aan haar sy, het Andriëtte ‘n perfekte balans gevind tussen ‘n moderne klank en die immergewilde country-geure wat tans in die mode is. “Ek het ‘n paar idees en lirieke na Emil gebring, en hy het die musiek opgebou. Ons het daaraan geskaaf totdat dit net reg geklink het,” verduidelik sy. Die resultaat is ‘n snit met ‘n country-twist, iets waaroor haar aanhangers al lank vra. “Country is groot nou, en ek wou daardie element insluit. Ek is bly ek kon daardie klank inbring,” voeg Andriëtte by.
Kyk die musiekvideo hier:
Andriëtte is tans op ‘n plek in haar loopbaan waar sy haar nie meer laat lei deur wat ander mense dink nie. “Ek wil musiek maak wat regtig iets vir mense beteken,” sê sy. En dit is duidelik hoorbaar in die vrolike en aansteeklike Afrikaans Het Nie Brieke Nie. Dis ‘n lied wat mense wil laat dans, braai, en met trots hulle kultuur vier – die perfekte metgesel vir enige vakansie.
Met die einde van die jaar om die draai, is hierdie nuwe lied die ideale klankbaan om die vakansie in te lei. “Ek wil hê almal moet lekker gaan vakansie hou met hierdie lied, en die nuwe jaar bring baie nuwe musiek – Andriëtte het nie brieke nie!” sê sy met ‘n breë glimlag. Gaan luister gerus na hierdie snit en ervaar die lewenslus van Afrikaans eerstehands!